ALEXANDER ANDERSON 1845-1909

-o0o-

TOSHIE NORRIE

O bonnie Toshie Norrie

   To Inverard is gane,

An' wi' her a' the sunshine

   That made us unco fain.

The win' is cauld an' gurly,

   An' winter's in the air,

But where dwells Toshie Norrie,

   O, it's aye simmer there!

O, bonnie Toshie Norrie,

   What made you leave us a'?

Your hame is no' the Hielands,

   Though there the hills are braw.

Come back wi' a' your daffin',

   An' walth o' gowden hair,

For where dwells Toshie Norrie,

   O, it's aye simmer there!

O, bonnie Toshie Norrie,

   The winter nichts are lang,

An' aft we sit an' weary

   To hear an auld Scots sang;

Come back, an’ let your music,

  Like sunshine, fill the air,

For where dwells Toshie Norrie,

   O, it's aye simmer there!

Railwayman, poet and librarian, Alexander Anderson was the author of the famous poem about the children who didn't want to go to sleep "Cuddle Doon"

-o=0=o-